BachLau’s Blog Vos Parate Ut Serviatis

(photo by Kim Anderson)

小朋友的世界就是那麼簡單。純真又可愛，卻又是這麼真實。

誰說小孩子不懂得愛？

以下內容轉自Facebook Notes。（已獲作者同意）

小朋友的愛情。

10 July 2009 at 12:08pm by Meimei Cheung

小朋友的愛情世界同愛情觀真係好好笑。

1. 大表弟話佢小息o個時會靜靜雞係佢暗戀個女仔台頭放一盒維他奶or檸檬茶(視乎個女仔鐘意飲咩),之後匿係遠處睇個女仔有無飲到。當我問佢「點解你唔當面請佢飲既?」佢答「唔駛啦,我睇住佢飲得開心我就開心,我唔想俾佢知邊個擺盒野係到」我再追問「咁你自己有無飲啊?(因為我知佢零用錢唔多)」佢話「一時時啦,因為唔夠錢,只可以買其他野食」

2. 二表弟揀女朋友條件「長直黑色頭髮,纖瘦」(二表係超典型天秤座哈哈), 結果宜家當我﹑我媽 or 佢地媽咪出門口前問「點啊我咁樣出街得唔得既時候」佢都會話「唔…ok啦…不過爭少少」, 因為我唔夠纖瘦,我媽唔係黑色頭髮, 佢地媽咪唔係長頭髮,有時會去衣櫃前幫我地襯衫。

3. 岩岩帶佢地去RTHK食早餐, 二表弟食食下奄烈忽然高聲問「表姐, 你有無失過戀啊?」我啞左,我媽係到喪笑話「梗係有啦仲駛問既」二表弟再追問「下!咁你失戀會做咩嫁?我都無見過你失戀既」我話「點丫!宜家失戀係咪要登報紙先!!」我媽又搭嗲「匿係屋企喊到死左你見唔到咋」二表弟一副古惑樣「哎呀!話我知丫嘛,等我安慰你」

4.大表弟說本身尋日有機會可以同女朋友出街,可惜因為唔聽話俾媽咪罰無得去,但其實到宜家佢都未試過自己一個去得遠既地方,唔知佢點帶女朋友去街

5.二表弟自稱有好多女朋友,其中三個主動話要嫁俾佢,但佢暫時最愛既係尋日同佢傾左十五分鐘電話既Aily,因為佢最靚,不過佢補充話同邊個結要大個先決定到,佢話只會揀要最靚o個個,但最希望係可以好似韋小寶咁有好多個老婆,我話香港實行一夫一妻制,唔可能有咁多個老婆,之後三兄弟係到討論可以去邊結婚

6.細表弟都唔執輸,佢都話自己有女朋友,而佢想做班長的原因係覺得女朋友有個男班長做女朋友會威d(細表弟係超典型獅子座!哈哈哈)

7. 大表弟有一日放學好雀躍咁問我媽「姨媽,住西貢d人係咪好有錢嫁?」我媽話「唔一定嫁wor」大表弟補充「我係學校有一個金色頭髮既女仔(應該係混血兒)暗戀我,佢住西貢嫁! 如果可以嫁俾佢就發達啦!」我媽問「你要咁多錢黎做咩丫!你好想發達咩?」大表弟答「係丫!我想要多d錢黎買高達」

8. 當我知道二表弟個女朋友叫Aily既時候,我問大表弟佢女朋友叫咩名,佢同我講「商業秘密」

9. 二表弟不停追問我有無男朋友,又做咩唔介紹俾佢識等等…問到我發脾氣勁話無丫無丫…佢就話「等我介紹d俾你啦」

10. 問到佢地幾時帶d女朋友俾我見下, 佢地話「等感情穩定左先」我再追問「咁即係幾時?」二表弟話「唔…中一啦」我問「點解中一先感情穩定丫?」佢話「如果到轉左學校都仲一齊應該無得變嫁啦」

11. 細表弟講起佢女朋友既時候有少少失落,我問佢做咩,佢話擔心二年班同唔到班。

真係睇到佢地覺得所有事情都好簡單好直接好實際同埋好好笑,
我諗下次我有咩感情煩惱應該問問呢三位大師,
等佢地指點下。

注: 大表弟五年班, 二表弟三年班, 細表弟一年班